للشاعرة / هالة محمود
عنيك فـى عنيا
كل ما تيجي
عينيك فـى عينيا
ألحق نفسي
وأبص بعيد
أصل أنا عارفة
عينيا وشوقها
من تسبيلة
النار هتقيد
بس حقيقي
اللي مفرحني
لما عيوني
تقول وتعيد
ألقى عيونك بتطمني
حُب فـى قلبي
وليكي أكيد
آه من نظرة
( زي برمودا )
اعترفت..
إني الموعودة
وإن كياني
ويا كيانك
وهيامي وهمسي
فـى أحلامك
لما أبعد وأهل يقولوا
والله بعودة
والله بعودة
آه مـن النني
تاه واتلخبط
أصل كيانه
داب فـى كياني
جاب أستيكة
ومسح الكل
ساب صورة
فارس أحلامي
والفارس وعينيه
فـى عبنيه
يفهمني فـ صمتي
ويقراني
يكتبني فـ فرحي
وأحزاني
حتى فـى صمتي
وصوتي العالي
أيوه فـى صمتي
وصوتي العالي
بسمع همسه
وأحس بلمسه
وأنا بيني وبينه
مسافات
أنا نفسي أقرب
وهقرب
وأسمع كل الدنيا
سكوت
قلبي وقلبك
بيقول دوم
بيقول دومدوم
دمودوم دوم
أنسى همومي
وأنسى قسايا
وأنسى الدنيا
بكل ما فيها
وأغرق بعيوني
فـى عيونك
لما هتيجي
عينيك فـى عنيه
هلحق نفسي
ما أبص بعيد
